زوج مدونه

الساعه 4 العصر وزوج المدونه نايم

واولاد المدونه في التمرين في النادي

المدونه شغلت الكمبيوتر وهوب لسه حتسجل دخول

ياماما هو مافيش غيارات نضيفه عندي ولا ايه

(هو دا ايه اللي صحاه مش كان نايم)

ازاي يا حبيب يفي الدرج التاني في الشفنيره

مافيش مش لاقي حاجه

طيب يا بابا جيالك

تدخل الاوضه تلاقيه فاتح الدرج الاولاني

يا بابا دي غيراتي انا

غيراتك اهه

النظره في عينه بتقول ما انا عارف

وياخد الزوج الغيارات ويدخل ياخد دش

تجري عشان تلحق الردود كتير على اخر بوست

وعاوزه ارد على الناس

سجلت دخول وقرئت اول تعليق ولسه حترد

يا ماما عاوز فوطه لو سمحتي

في حد في الدنيا يدخل يستحمى من غير فوطه)

حاضر يا بابا

وترجع جري على الكمبيوتر عشان تكمل رد

يا ماما يا اما يا اماتي...دا التليفون بيرن الرنه بتاعه العيال

خير الله ما اجعله خير

ايوه يا حبيبي

مامي الكابتن استاذن بدري تعالي خدينا

طيب جايه ما تتشاقوش على ما اجي وبلاش ا لعناب الساقع اللي بتاخدوه من الكافيتريا

بابا الكابتن اعتذر والعيال مستنينك

ولا ردددددددددددد سكون تام

ترد بسرعه على تعليق في البلوج

يا بابا.....وبتبص ناحيه الباب لقيته واقف ماشاء الله وعنيه حتطلع على الشاشه وبيقول

سمعتك

ايه يا ماما في حاجه

بقولك الكابتن اعتذر والعيال مستنينك في النادي

ابتسامه صفرا

يماما انتي مش عارفه ان في اجتماع اتحاد ملاك النهارده عند الاستاذ ص

نظره انتصار

ونظره حصره

خدي المفاتيح وروحي هاتي العيال

..........................................

تسجل خروج من غير ما تكمل رد

حرم مدون

الساعه 10 صباح يوم اجازه

المدون بيقول يا هادي وبيفتح الكمبيوتر
حرم المدون بتنده من المطبخ ...مش حتنزل تجيب لنا الحاجه اللي كتبتها لك في الورقه
المدون لا تعليق!!!!!!!!!!!
اخيرا الدايل اب جمع وبدا يفتح المدونه
حرم المدون لسه من المطبخ بتقول انت ما سمعتنيش ولا ايه
المدون لا زال لا تعليق
الحمد لله البلوج فتحت وحيبص على اتعليقات الجديده على اخر بوست
(حرم المدون وصوتها بقرب (تقريبا سابت المطبخ
في ايه انت مش بت رد ل ي ه
اه انت قعدت قدام الجهاز طيب!!!!!!!!!!!
المدون اه بس ببص على التعليقات الجديده على البوست الاخير
زوجه المدون لمحت اسم صاحب اخر تعليق (شركسيه) ودي بقى راجل ولا ست ان شاء الله
المدون يا ستي وانا ايش عرفني حد ساب تعليق حرد عليه انا حتجوزه
زوجه المدون طب وريني كده ايه اللي مكتوب
المدون استني بس لما ارد الاول
زوجه المدون تلمح المكتوب
(بوست عسل خالص ايه الحلاوه دي بجد بجد بوست يجنن باي)
زوجه المدون عسل اسود ومهبب على دماغها
المدون يبصلها وما يردش
المدون مش عارف يركز في الرد لان فيه تلات ردود لسه عاوز يرد عليهم
زوجه المدون مش حتنزل بقى تجيب الحاجه من تحت
المدون يبصلها تاني طب اخلص وانزل
المدون يحاول يركز
زوجه المدون طب ما تنساش ابقى خد كيس الزباله معاك و صوتها بيبعد
المدون يرجع تاني للبلوج ويجي يرد
يفاجا بان الدايل اب فصل
ويسمع صوت زوجه المدون بتكلم صاحبتها في التليفون
اصلها رفعت السماعه من الصاله فباتالي الدايل اب فصل
المدون يشد فيشه الجهاز وياخد كيس الزباله وينزل
زوجه المدون تخلص المكالمه بسرعه
وتجري على الجهاز تفتحه وتدخل البلوج
تروح على شركسيه
تفتح البروفيل تلاقي

Age: 44
Gender: Male
Astrological Sign: العقرب
Zodiac Year: الحمار
Industry:مدرس
About me:بحب الاكل اوي
Blog name:شركسيه

تفصل بسرع النت وتطفي الجهاز
المدون رجع شايل الحاجات ودخلها المطبخ
زوجه المدون مش حتدخل ترد على الناس اللي بعتالك تعليقات على البوست الاخير
المدون بيبصلها وياخد بعضه ويدخل الصالون يفتح التلفزيون على الجزيره

ملحوسه: الموضوع كله محض تاليفي ولا يمت للواقع بصله
ولو فيه تشابه بين التاليف والواقع مسؤليه الواقع مش مسئوليه المؤلف

استايبنا