احلى حاجه في بحرنا انه فعلا
ملوش حدود
بص له............. واسرح
وخلي حلمك في الافق يرمح
بهبه ريح
بلسعه شمس
بيوم غيمه يمطر ......ملح ؟؟
وساعه المغرب تنزل شمسنا تغطس
وبعدها تغمض عنيها
ويبدا النسيم في الهمس
ويوم ما نرجع اكيد اكيد حتفتح بابها
وبالاحضان تلاقينا
وكل الحبايب مستنين اليوم
اللي يرجع ليهم حبيبهم
اللي فيوم سافر
ملحوسه: دامش شعر دي مجرد دردشه
24 comments:
انا بحب اسكندريه اوى
برغم انى مرحتهاش اكتر من مره
شهر يناير
واسكندريه كمان بتحب اللي بيحبها
حتى اسأل الميه والهوى
تنولر وتانس بيتك ومطرحك
يااه دا كله دردشة بس
كلمات راائعه
و أحلي حاجه فيها
إنها صادقة
تبأه أحسن من أي شعر الواحد مش بيحسه
:)
تحياتي و تقديري
عقد الياسمين
اي والله دردشه
اشكرك على الاطراء
واذا كانش الواحد يحس باللي حيقوله يبقى قله احسن
تحياتي وشرفتيني
خواطر بسيطه ومعبره
وجميله والاجمل انك بتتكلم عن حاجات كلنا بنحبها
ولحظات الغروب الرائعه
كلنا لنا ذكريات مع البحر والغروب
منتظرين المزيد من الحاجات الحلوه
دودو
دودو
انا بجد فرحااااااااان جدا انك بتتفاعلي مع كتاباتي
اكيد كلنا بنحب البحر
وكلنا لينا ذكريات مع البحر وعلى البحر وانا شخصيا ليا ذكريات على صفحه ميته الهاديه
او صفحه ميته مع النو
اما الغروب حدث ولا حرج
على شط البحر في الساحل الشمالي لما كنت اسيب الناس كلها واجري على الشاطئ عشان اشوف الشمس وهي بتغطس بضفايرها الصفرا في الميه
ومعايا حبيبي..... والبحر
ان شاء الله كل زياره تاكدي انك حتلاقي حاجه جديده
نورتيني
كلامك حسسنى انى بجد واقفه قدام بحر اسكندريه .. هتخلينى انزل من البيت بكره و اقف قدام البحر عند الغروب
لما ده يبقي مش شعر اومال ايه ؟؟
كلامك جميل اوى يارب ترجع بالسلامه
dalia
انا سعيد اني اسمع الكلام ده
يلا الجو حلو انزلي اقفي على البحر وانتظري الغروب وفي ايدك كاميرا وصوري المنظر صدقيني حيكون جميييل اوي
برضه انا بقول دا مش شعر دي مشاعر انا حستها
الله يسلمك ويسلم كل مغترب يارب
نورتي البوست دا والبلوج كلها
والله فكرتنا بايام وليالى عشناها فى احلى بلد واحلى مية واحلى هوا واحلى واحلى من كدا مفيش يا حموووووو
انت عايش فى قطر وانا فى ابوظبى يعنى الحال من بعضه وربنا يكرمنا ونرجع نشوف بحرنا ونشم هواناوناكل سمكنا ونتمشى على الكورنيش بتاعنا وتدومى يا اسكندرية منارة التاريخ والعلم
عمااااااااار يا اسكندرية
احمد مصطفى
احمد بك مصطفى
نورت البلوج يا جميل
والله بجد احنا فعلا مشتاقين ومحتاجين لهواها وبحرها وكورنيشها وسمكها وكل حاجه فيها
ربنا يرد الغايبييين كلهم بالسلامه
ونورت مره تانيه
من قلب عاشق ولهان لاسكندرية حبى انا
انا فعلا فرحان اوى ومبسوط اوى من المدونة الجميلة اوووووى يا محمد باشا
وانشاء الله نتجمع سوا هناك فى حضن الاسكندرية وانا عازمك على اكلة سمك على البحر لما نرجع انشاء الله ...
احمد مصطفى
يارب يا خويا يارب
عزومه مقبوله يا جميل
تعيش وتعزم وتتعزم برضه
ههههههههههه
كلام جميل كانه خارج من حبيب لحبيبته ولا كان ليه دى الحقيقة انا اسكندرانى وبموت فى بلدى
بوست مؤثر علشان صادق
سلام
3ayash
والله انا على قناعه بان الاحاسيس لما تتكتب بتكون صادقه اوي وبتوصل للقلب اوي وتاثر فيه زي ما اثرت على اللي كتبه واللي قرأه
اهلا بيك في اسكندريه كمدونه
ومرحب باسكندريه اللي في قلبك
نورتيني
صباح الخير يا حموووو باشا
والله اول ما جيت مكتبى قلت افتح المدونة واشم شوية هواء واستمتع ببحرنا وهوانا وشمسنا...والله يا حمو انت عملت فينا معروف كبير اوى
ماتنساش عزومة السمك فى بحرى لما نرجع انشاء الله
سلام يا باشا
احمد مصطفى
يا مرحب بالحابايب
وريحه البحر ساعه الصبحيه
احلى اصطباحه
لا بحري ايه
اقولك ناخد برجوله حلوه كده في ابو قير
ونخلي الحاج مرسي يعملنا شويه سمك بوري سنجاري
وسلطه طحينه بالتوم والكمون
وطاوله عيش بلدي واديها
صباحكو بيضحك
ماشى ياباشا
خليها فى ابو قير
كلها اسكندرية برضو
وصبح على عم مرسى
صباحو فل
احمد مصطفى
بحرنــا؟؟
يــااه على بحرنا
ده أنالما أشوفه في التلفزيون وأركز في المية شوية دموعي بتزل
بحس إن قلبي مسجون ورة إزاز التلفزيون و مش عارفة أمد ايديوأطلّعه
تحياتي ليك يا إسكندراني.. ولكلماتك اللي إنت بتتواضع و تقول عنها ((دردشة))
ومبورك ع المدونة ولو إنها متأخرة
تحياتي
:))
احمد مصطفى
صاباح العسل وربنا يجمعنا على خير يارب
hannoda
عارفه لو غمضتي عينيكي
واتخيلتي البحر
حتشوفيه وتسمعيه وحتحسيه
وحتدوقي حلاوه ملحه
في اللحظه دي انسي الدموع
وافتكري بس
بحر اسكندريه
الله يبارك فيكي ياستي
البيت بيتكم في اي وقت تنورو
اسكندريه
شرفتيني
السلام عليكم
اسكندريه وبحرها
تعرف من اربعه وعشرين ساعه بالظبط كنت بعشق اسكندريه وناسها وكنت بعمل المستحيل علشان اصيف هناك السنه دي
بس بسبب ناسها اسفه ناس عايشين هناك كرهتا
bossy
اتمنى ان سبب كرهك لها ما يكونش البلوج ده !!!!!!!!
اعتقد ان كلمه كره صعبه اوي
ممكن ماتحبيش الناس دول
لكن تكرهي اسكندريه
اتخيل صعب
معلش ربنا يفرج الهم عن قريب
محمد باشا حسن
اولا كل سنة وانت طيب ودايما كدا يارب تكون ايامك كلها اعياد وان يبارك الله لك فى عمرك وصحتك وتنول اللى فى بالك وتعيش وتعيش دايما يارب اخ اكبر فاضل وعزيز وصديق مخلص وانسان محترم نعتز كلنا بمعرفته وصداقته.
ثانيا مبروك لينا وللنادى الاهلى الكبير الكاس وعقبال كل مرة
ثالثا والله واحشنا يا باشا وواحشتناايام السمك فى ميتسوبيشى.
نشوفك على خير
دعواتك
اخوك
احمد مصطفى
احمد مصطفى
انت فيييييييييين يا راجل محدش شافك من زمان
يا سيدي اشكرك على معايدتك
ومبروك للاهلاويه
انا ماليش فيها ما انت عارف
اشكرك على الاطراء وربنا يديم المعروف والمحبه
ونشوفك على خير نرجع الذي مضى
تقبل تحياتي
Post a Comment