الساعه 10 صباح يوم اجازه
المدون بيقول يا هادي وبيفتح الكمبيوتر
حرم المدون بتنده من المطبخ ...مش حتنزل تجيب لنا الحاجه اللي كتبتها لك في الورقه
المدون لا تعليق!!!!!!!!!!!
اخيرا الدايل اب جمع وبدا يفتح المدونه
حرم المدون لسه من المطبخ بتقول انت ما سمعتنيش ولا ايه
المدون لا زال لا تعليق
الحمد لله البلوج فتحت وحيبص على اتعليقات الجديده على اخر بوست
(حرم المدون وصوتها بقرب (تقريبا سابت المطبخ
في ايه انت مش بت رد ل ي ه
اه انت قعدت قدام الجهاز طيب!!!!!!!!!!!
المدون اه بس ببص على التعليقات الجديده على البوست الاخير
زوجه المدون لمحت اسم صاحب اخر تعليق (شركسيه) ودي بقى راجل ولا ست ان شاء الله
المدون يا ستي وانا ايش عرفني حد ساب تعليق حرد عليه انا حتجوزه
زوجه المدون طب وريني كده ايه اللي مكتوب
المدون استني بس لما ارد الاول
زوجه المدون تلمح المكتوب
(بوست عسل خالص ايه الحلاوه دي بجد بجد بوست يجنن باي)
زوجه المدون عسل اسود ومهبب على دماغها
المدون يبصلها وما يردش
المدون مش عارف يركز في الرد لان فيه تلات ردود لسه عاوز يرد عليهم
زوجه المدون مش حتنزل بقى تجيب الحاجه من تحت
المدون يبصلها تاني طب اخلص وانزل
المدون يحاول يركز
زوجه المدون طب ما تنساش ابقى خد كيس الزباله معاك و صوتها بيبعد
المدون يرجع تاني للبلوج ويجي يرد
يفاجا بان الدايل اب فصل
ويسمع صوت زوجه المدون بتكلم صاحبتها في التليفون
اصلها رفعت السماعه من الصاله فباتالي الدايل اب فصل
المدون يشد فيشه الجهاز وياخد كيس الزباله وينزل
زوجه المدون تخلص المكالمه بسرعه
وتجري على الجهاز تفتحه وتدخل البلوج
تروح على شركسيه
تفتح البروفيل تلاقي
Age: 44
Gender: Male
Astrological Sign: العقرب
Zodiac Year: الحمار
Industry:مدرس
About me:بحب الاكل اوي
Blog name:شركسيه
تفصل بسرع النت وتطفي الجهاز
المدون رجع شايل الحاجات ودخلها المطبخ
زوجه المدون مش حتدخل ترد على الناس اللي بعتالك تعليقات على البوست الاخير
المدون بيبصلها وياخد بعضه ويدخل الصالون يفتح التلفزيون على الجزيره
ملحوسه: الموضوع كله محض تاليفي ولا يمت للواقع بصله
ولو فيه تشابه بين التاليف والواقع مسؤليه الواقع مش مسئوليه المؤلف
استايبنا
48 comments:
تصدق انا يا مدون يالي مش متجوز بعاني المعاناة ده
بس من امي
كل 5 د مين فلانة مين فلان علق كده ليه علقت كده ليه
والي ذاد وغطي انها بتعلق عندي شوفتوا الخنقة ؟
العزيز اسكندراني قوى
أمي بتنده عليا من المطبخ
انت فين؟
وانا ما باردش
تعالى اوريكى حاجه
جريت احسن تكتشف انى على الكمبيوتر
بعد ساعه
الست مش سامعالى صوت
فجأه الست واقفه على باب الغرفه وحاطالى ايدها فى وسطها
والشششششششششششرررررررررررررر
بيفط من عنيها
يعنى انت مسش احسن من ولادك اللى بيصحوا يقعدولى على الجهاز من قبل ما يغسلوا وشهم
قلبك ابيض با حاجه
اؤمرى
الاكل جاهز لما تخلصى ابقى جطى السفره
عنبا حاضر ثواتى وكل شىء يكون جاهز حضرتك
ههههههههههههههههههههههههههههههههههههههههههههههههههههههههههههههههههههه
احمد عبد الفتاح
ربنا يخليلك الست الوالده يا سيدي
ماهو اصل لازم ناس تحط مناخيرها في حاجه الناس التانيه
هههههههههههههههه
والله كويس انها بتدخل تعلق على البوستات بتاعتك دا شيئ جميييييييييل
ربنا ما حرمكو من بعض
شرفتني
loumi
هههههههههههههههههههههه
برضه ما فرقتش كتير
يبدو ان هناك كومبينه معموله على البلوجرز عشان يحاصرونا وما نعرفش ناخد راحتنا
هههههههههههههههههه
المهم طبعا البوست اخدك والسفره اتحضرت بعد ساعه
وبعدين العيال لازم يغسلو وشهم الاول قبل ما يقعدو على الكمبيوتر
هههههههههههههههههههه
نورتيني
دمه خفيف اوى البوست ده
ضحكنى اوى هو تقريبا مش
الزوجه بس اللى بتعلق على زوجها
ممكن امه او اخته
طالما فى حواء وادم فى بيت واحد
لازم تبقى فى مغامرات توم وجيرى
شويه تعليق زى زوجه مدون وشويه
هدوء وسلام وشويه مشاركه
وشويه شد وجذب اى كانت طبيعه العلاقه
لازم يبقى فى حاجه مش غلاسه ولا حاطه مناخيرها
بس هو كده ههههههههههههه
يلاسلام
دودو
أهو أنا بقا نفسى آدم بتاعى يعمل كماشة عليا كدة
بس هو بيقرالى بس
مش بيعلق
وقال بيفرحنى وبيقوللى
انا بادخل البلوجات اللى فى الأدد عندك يا حبيبتى... ويقعد بقا يوصفلى مدونة فلانة وعلانة وفلانة بتكتب كويس جدااااااا
وعلانة ذوقها فى مدونتها عالى جدااااااااا
وأنا اطرقع زى الفيشار جداااااااا
لحد ما فين وفين يفتكر مدونات الرجالة ويعدها لى
ويقول عليها زى ما قال على اللى قبلها
وبعدها تهدأ العاصفة
مرة واحد الله لا يوفقه
دخل مجهول وهات يا حب وغرام فيا فى التعليقات فى مدوناتى كلهم
ويلطعلى نفس التعليق
كاااانت أيام غبرا
الله لا يرجعها....وكنت فعلا حأعمل قفلة عالمدونة كلها واللى فيها من النكد اللى حصللى من تحت راسه
بس الحمد لله عدت على خير
وربنا يكفيك شر المستظرفين
بينى وبينك؟؟؟
بأبقا طايرة من الفرحة لما بأعرف أنه مهتم باللى بأعمله وبيتابعه
دودو
انتي شايفه كده
طيب خلاص سيبو البلوجرز في حالهم بقى بدل ما اجيبلكو ميكي يقعد في البلوج
نورتيني وشويه زياده
بالمناسبة
اسفة على تفويت تهنئة عيد الميلاد
كل سنة وانت طيب
والسنة اللى جاية تكون حققت اللى بتتمناه السنة دى
شهروزه
فينك محدش شافك من زمان
معلش يا شهروزه ربنا يكفينا شر المستظرفين
وفي حالتي المستظرفات
اكيد الطرف المدون بيحب الطرف التاني يتابعه
ويعلق ويقول رايه
انا عندي برضه المدام كده
احيانا يعجبها واحيانا لا
بس هي النقطه ان
احد الطرفين ما ينشغلش كليه عن الطرف الاخر
الموضوع طويل
اوي
اوي
لكن اللي اسعدني بجد تشريفك
نورتي
وتحياتي لادم
شهروزه تاني مره
الف شكر ليكي على اللفته دي
ويارب ربنا يحقق امانينا جميعا
ههههههه
إنت بتتكلم عن مراتك وألا مراتي؟ شكلهم كده دفعة واحدة
أنا عندي الحاجة بتعتبر إن المدونة دي ضرتها وإنه كان يوم بنفسجي يوم ما فتحتها
وكل يوم وأنا في الشغل تقعد تتابع التعليقات وتحديدا تعليقات البنات وكمان تروح مدوناتهم وتشوفني قايل إيه عندهم وتوقيت التعليق كمان
وأرجع البيت ألاقيها بتنبط بالكلام على تعليق فلانة وعلى جرأة علانة وعلى مين اللي واخده عليا قوي
ربنا يهديهم وينصرنا بإذن الله
ايه يا مراكبي
انت بترشقني يعني ما انا قلت في اخر البوست ان لو في تشابه يبقى مسؤليه الواقع هههههههههههههههه
عموما هو يوم بنفسجي فعلا
انا مش عارف لما انزل مصر حعرف افتح البلوج اصلا ولا لا
هههههههههههههههههههههههه
اللهم انصرنا
تحياتي يا قمر ونورتيني
على فكره
تيجي نرقص تانجو
الف شكر علي تعليقك عندي في البلوج
و فعلا كل اللي انت بتقولة واقع سواء مع اللي متجوزين او اللي مش متجوزين
الف شكر يا ريس و بالتوفيق
والله الموضوع دا بقي بيخنق ناس كتير اوي
بس انا ولا بيهمني
بحط حدود علي طول
ربنا يخلي الاب توب بقي
شخصي صحيح بس مش علي بابا وماما
بس علي مين
؟
ههههههههههههه
حلو اوي الموضوع بجد والله يكون في عون الي بيتخنقوا كدا
تسلم ايدك والف شكر علي زيارتك لمدونتي
سعيده بيك جداواتمني اشوفك دايما
تحياتي
مشربيه
نورت البلوج وشرفت البوست بتعليقك
مش بذمتك برضه كلامي صح
هههههههههههه
اهلا وسهلا بيك
اسكندراني
انا عملت المدونة دي علشان اكتب اللي انا عايزاة في الوقت اللي انا عايزاة
حياتنا مليئة بالتحفظات خاصة البنت او الست الشرقية عامة
ما تتكلميش بصوت عالي الناس تقول عليكي ايه؟
ما تضحكيش كده كفاية ابتسامة خفيفة
لما تتكلمي مع زمايلك الرجالة ماتندهيش باسمه حتى لوكان عيل من دور عيالك
لما تردي على الايميلات ما تبدأيش ب عزيزي او dear فلان
بالك انت لو حد من احزاب المعارضة دي والمتشددين اخد خبر بالمدونة دي هيبقى آخر يوم فب عمر المدونة ويمكن آخر يوم في عمر ناس تانيين
المدونة بتدي الانسان مساحة من الحرية في تبادل الآراء بعيدا عن التشدد وفي حدود اللياقة طبعا
البوست لذيذ جدا وتحياتي
وغيرها وغيرها
gohayna
نورتي يا ستي
انهو لاب توب دا احنا لو دونا من الموبايل برضه في قفانا
ههههههههههههههه
بس والله مراتي مابتعملش كده ابدا
دي حتى بتعلق على مواضيعي ومبسوطه
انا اللي سعدت بزيارتك
وحنتقابل كتير
تحياتي
mimi
طب وبتزقي ليه كده
هههههههههههه
اكيد هناك حصااار حول السيدات والبنات في العالم العربي دا اكيد
ولكن والله برضه احيانا للمصلحه
اما حكايه الكلام مع الغير دي بقى بتخضع ل300ظرف
لازم فيها الاحترام
احترام السيده او البنت لنفسها يجبر الاخرين على احترامها
نهايته ما عليناااااااااااا
ربنا يبعد عنك عيون العسس
ويسترها معاكي
تحياتي ونورتيني
بوست ساخر ومعبر
خاصة انه يظهر لنا حقيقة الزوجة
:)
تحياتي
صاحب البوابه
لا مش هي دي حقيقه الزوجه
الزوجه
ام
اخت
حبيبه
عشيقه
روح
حتى لو ليها بعض السلبيات
اشكر ليك زيارتك
حلو اوى الحوار اللى بين الزوجة والزوج حوار عصرى بصراحة اوىىى
بس الافضل ان الزوجة تشجع زوجها وتبقى عارفة ان التعليقات دى مجرد تعليق مش اكتر المهم تثق فى زوجها
بس بجد بوست حلو اوىىىى
على فكرة يا اسكندرانى كنت عاوزة منك خدمة بس مش عارفة ابعتلك على ايه؟
وشكرا لتعليقك على مدونتى بس فيها شبه من مدونتك شوية
WHO DOES NOT LEAVE TO GROW THE CHILDREN WILL BE ALWAYS SMALL.
aliaa
والله ماهما كانت متبادله برضه بيظل شبح الغيره يخيم على الموضوع
ودا شيئ طبيعي
لي الشرف ان مدونتي فيها شبه من مدونتك
لو تقصدي من ناحيه اليمبليت
انا بحب اللون الروز ده
ومراتي كمان بتحبه
وبصراحه هو احلى الموجود بس قريبا حغيره مع اللوك الجديد يعني التغيير مطلوب برضه
تحياتي ليكي
بعت ايميل العبة
شوفوه بلييز
حلوة اوى اووى
طيب ولو هيا مدونة وهوة ما لوش فى الموضوع هيعمل اية
اسكندرانى بالجامد
شوف ياحبيبى الواحدة بعد ماتتجوز بتعتبر ان جوزها بقى ملاكى وكانت والدتى ـ يرحمها الله ـ تقول
الواحدة منا عاوزة الراجل
حالق راسة وعادم ناسة
وفية اغنية لفايزة احمد بيقول الكلام
اخد حبيبى انا ياما
اخد حبيبى يابلاش
وانيس منصور مرة كتب تعليق على الاغنية قال
اخد حبيبى انا ياما
او يخدة ربنا
يابنى كلهم كدة
الحق امشى قبل مراتى ما تكتشف اللى انا كاتبة ـ التدوينة دية حلوة بجد
ايوة كدة ورينا المواهب ـ تحياتى
mariamagdolen new
واله بقى دي برضه حتبقى مشكله تانيه
وحنشوف زوج مدونه حيعمل ايه في البوست الجاي ان شاء الله
تابعونا
ههههههههههههه
نورتي
جدو
ازيك يا جدو وازي صحتك دلوقتي
حلوه ملاكي دي ياجدوتقريبا كلهن كذلك
بس برضه فيهن متفاهمات للوضع
وربنا يسهلنا ويبعد عنا عيون العسس
يبدو يا جدو ان زوجه حضرتك دفعه واحدهمع زوجتي وزجه المراكبي هههههههههههههههه
ولاواهب ولا حاجه ياجدو دي بس كده شخبطات
نورتيني وخلينا نشوفك
تحياتي
david santos
u r rit my dear
can i ask u if u can readr arabic
looooooooool
هههههههههه
طب تخيل لو كانت طلعت واحدة
تخيل اكتر لو زوجة المدون دخلت ترد ع التعليقاااااات؟؟؟؟
هههههههه
تحياتي
تدوينة جميلة جدا جدا
عسل سكر خالللللللللللص
هههههههههههههههههه
ربنا يهدينا ويهديك ويهدي امة محمد
امين
اما الزوجة الكريمة
ربنا يبارك لك فيها ويرزقك خيرها
والسلام
SAKAyAR
مش عارف كان ايه اللي حصل
اعتقد كانت الدنيا اتكعبلت بزياده
هههههههههههههههههه
عموما ربنا يستر
نورتني
Islamist Bloke
يارب ربنا يهدينا جمييييعا
واشكرك لدعائك وربنا يتقبل
وعليكم السلام ورحمه الله
شرفتني
بصراحة ده شغل عالي
موقف عرفت تستغل فكرته ونفذتها صح بدون اي فذلكة هي دي الدماغ اللي بتشتغل صح وعارفى هي بتعمل ايه وبتقول ايه وده ممكن تعمل منه كتير وتمتعنا لو ملكة المواقف دي شغاله عندك على طول وفي الاخلا ممكن نعمل مدونة لوحدها وتخليها للموقف فقط وتسميها مثلا مواقف
يااااريت
وتكون المعالجة بنفس الاسلوب البسيط ده
شكراً
حسن ارابيسك
نورت يا جميل
والله يا جماعه ده شغل على قدي خااااالص
وتصدقني لو قلتلك انه بجد محض خيال ليس الا
ومش موقف ولا حاجه
يا عم بس اعرف اظبط البلوج دي الاول وبعدين افكر اعمل واحده تانيه
انا مش عبقري بلوجرز زيك يا عم
نورتني يا ارابيسك
تحياتي
استابينا يا ملعم
ههههههه
بس والله حركة بنت حركة وربنا يخليك للمدام لو كان فيه مدام وتكونش مسئولية الواقع المرير
مع تحياتي
السلام عليكم
حائر في دنيا الله
نورت يا زعيم
الحمد لله في مدام بس مابتعملش كده
انتو ليه بس حولتوها قصه حقيقيه
ممكن تكون بتحصل في الحقيقه
لكنها خيال من تاليفي
بلاش تاليفي من تخيلي عشان انا مش مؤلف
استينا
السطه اللنش
السلام عليكم
ربنا يستر ها مع كل المدونين
بس هي علي فكره المفروض حريه
اكلم اللي انا عايزاه
اكتب اللي انا عايزاه
يعني مش من حق اي حد يدخل في شئ يخصني
حتي لو كان دا خوف عليا
المره اللي جايه ركز مع زوج المدونه
bossy
نورتي عاش من شافك
والله هي الحريه مكفوله للجميع مع التقيد طبعا باداب كتييييييييييير
مش كده ولا ايه رايك
والله زوج مدونه جاهز بس في ناس قالتلي حيبقى فكره مكرره
ايه رايكو
التدوينه دى جميله أوى
حسيت أنى أودام زوج طيب وحنون
ربنا يخلى المدون لزوجته
اشكرك والحمد لله ان التدوينه عجبتك
والله هو الزوج طيب والزوجه طيبه بس هو شغل بلوجات بقى نعمل ايه
نورتيني
بوست لذيذ للغاية
من اجمل ما قرأت مؤخراً
تحياتي
صاحب البوابه
يا اهلا وسهلا
والله دا شرف ليا يا سيدي لما تقول كده
لك تحياتي
Rodrigo
even blogs are full of ADV`s
thx my dear i like my T shirt as it is
يانهار أبيض
فى مدونة أسمها أسكندرية و أنا ماعرفهاش
عيب عليا و الله
كل الاسكندرانية لازم يساندوا بعض
و لا أيه؟
على العموم الموقف ده بقابلوا دايما ً مع اهلى فى البيت
هتلاقى دايماً اللى واقف فوق دماغك و بيقولك
أيه اللى بتعمله او كفاية كده
أو كلام كتير
على العموم أهلاً وسهلاً بيك فى المدونات و عالم المدونات الأسكندرانية
احمد بلال
هو النهار ابيض فعلا عشان شفتك فيه
صبح كده وروق حصل خير يابو حميد مافيش مشكله
واديك برضه جيت ونورتني
وهلابيك ياقمر
اكيدكل الاسكندرانية لازم يساندوا بعض
على فكره البلوج بتاعتك حلوه
والغنيه جنااااااااااااااان
شرفتني
انا الحقيقه لسه ما اعلنتش فى البيت خبر افتتاح المدونه بتاعتى بس خير ان شاء الله التعليقات ها تخلينى افكر تانى.. او تفضل بقى مدونه سريه يلا بقى زى اطفال الشوارع حاجه غلب كدا.. وعلى فكرة صور الابيض والاسود حلوة اوى.. وممكن اسال انا سوال بالعكس ها تحب ان تشاركك اسرتك او تتابع مدونتك والى اى حد
بنت القمر
يعني افهم من كده ان المدونه دي لسه في البيت محدش يعرف عنها حاجه
يا خرااااااااااااابي
الحمد لله ان الصور عجبتك
وبكده حضرتك حطيتي ردين على بوستين في وقت واحد
ما علينا حنعديهااااااااااااا
انا اسرتي عارفه
زوجتي وامي واخويا
وانا اساسا حاطط اللينك بتاعها على المسنجرات
يعني فضيحه وفضيحه بجلاجل
هههههههههههههههههه
بجد نورتيني
Post a Comment